رحلة الثلاث الاف ميل تبدأ بواسطة (ابتعاثي لبريطانيا)

**رفحاوي** · 05 Apr 2005, 03:06 AM

رحلة الثلاث الاف ميل تبدأ بواسطة (ابتعاثي لبريطانيا)

بعد التخرج من جامعة الملك سعود – كلية الهندسة كانت امنيتي الوظيفة ولم افكر ابداً بدراسة الماجستير واخر شيء كنت اتوقعه ان ابتعث لدراسة الماجستير في الخارج ...عندما توظفت حاولت ان احصل على دورات بامريكا من اجل تقوية اللغة الانجليزية اولا ثم المعلومات ثانيا ... وبعد ان تقدمت بطلب الحصول على دورة بامريكا قال المدير العام لماذا لا يذهب لدراسة الماجستير ؟!

وعندها بدأت التفكير بالماجستير وبدأت رحلة المعاناة ... اتصلت بزملاء الجامعة الذين ابتعثوا للخارج من اجل الحصول على قبول ... راسلت جامعة واحدة ببريطانيا واكثر من جامعة بامريكا ... فجائني القبول من بريطانيا خلال شهرين اما امريكا فلم يدرسوا طلبي لانني لم ادفع لهم 50 دولار !! كنت خلال هذه الفترة اقنعت احد زملائي بالرفع بدراسة الماجستير خاصة وان والده بالمرتبة (14) ويجب عليه ان يستغل منصب والده قبل التقاعد

رفعت قبول بريطانيا وافادوني الجهة المسئولة عن الابتعاث بان الشروط لا تنطبق علي ... عندها (طفشت من الرياض) وحاولت ابحث عن أي دورة خارجه ... وبعد متابعات وواسطات قبلت بدورة بالشرقية وسعدت كثيرا بهذا القبول ... غادرت عملي ونقلت اولادي لرفحاء وبعد 4 ايام اتصل مديري واخبرني بانه تم الغاء دورتي ... زاد الطفش ودبلة الكبد للرياض وتركت عيالي برفحاء يرتعوا ويلعبوا ...

قمت بعدة محاولات ولكنها باءت بالفشل الذريع بدعم بعض الاشخاص ... زميلي حصل قبول بامريكا وارسله ابوه للمدير العام حتى يرفع له بالابتعاث ... وعندما دخل على المدير العام واخبره قال المدير العام : وليش .... (اسمي) ما يروح ؟!! قال زميلي : ماني مانعه ، ارفع له ... ومن هنا رفعوا لي وشبكوا موضوعي معه بخطاب واحد ...

وتعاونا على ابتعاثنا ... هو يمشيها من ادارة وانا امشيها من ادارة حتى بقت الامور المالية وكلمت مسؤول شمري بالمرتبة (14) وما قصر ارسلن على واحد ومشت الامور ... الغريب بعض الشروط ما تنطبق علينا وبعض الشروط ما جبناها كاملة وبالاخير صدر قرار الابتعاث لبريطانيا ...

كان معي مهلة اسبوعين قبل الدراسة ورحت لسفارة المملكة المتحدة عشان اطلع تاشيرة وطلعوا لي بطلبات كثيرة منها تاكيد السكن هناك ودفع الرسوم ... وادور لي واسطة وفعلا لقيت واحد ارسلن على موظف بالسفارة واخذ الجوازات والفلوس وطلع التاشيرة (يقولون مايعرفون الواسطة ) ...

قبل موعد السفر باسبوع وديت اهلي لرفحاء وقضيت هالاسبوع عندهم بانتظار المستقبل القريب بتشوق وترقب وشيء بسيط من الخوف ... كان موعد السفر يوم 4 بتمبر 2001 م يعني قبل 11 سبتمبر باسبوع ... انتظروا الجزء الثاني اذا تحبون ...

**الزعيم** · 05 Apr 2005, 02:21 PM

نحب .... كمّل يا ( بش مهندس )

**ليث** · 05 Apr 2005, 08:10 PM

هلا رفحاوي اثريك واسطه

تكفى ابي قبول من انقلترااااااااااااااااااا

عموما متشوئين كتير ........... كمل

**ثقافي** · 05 Apr 2005, 09:27 PM

[align=center]ايوه يا رفحاوي

فضفض كذا شويه وخلينا نشوف تجربتك الشخصية

وأسلوبك زي العسل ماتع جميل

انا انتظر الجزء الثاني على احر من الجمر

فعجل به .[/align]

**ابو مشعل** · 05 Apr 2005, 11:24 PM

الله يعينك الي هذا اوله الله يعينك على تاليها

**رفحاوي** · 06 Apr 2005, 03:11 AM

[align=center]الجزء الثاني :

قبل ما ابدا ابي اعلق عى الشبيبة ...

مشرفنا الزعيم :

حاضر ياباشا...

اخوي / ليث

سهل ربك والا الابتعاث مشربك من كل اتجاه ...

تخصصي هندسة كهربائية ... مدري انا رفيقك والا لا ... كان رفيقك سكبة وخوش رجال وهو محاكيك وكانه لا ما اعرفه ... قابلت ايام الجامعة بعض شباب رفحاء وكنت اشوفهم بمطعم البهو ... من جيراني بالسكن النجم الصاعد بندر صياح ...

اذا تكلم جد وتبي قبول ارسل لي عالخاص ...

اخوي / ثقافي

الله يسلمك ... صح اني عسل ومحد يختلف معك بس لا تنس ان عسلي ماهو الا انعكاس لعسلك ...

اخوي / ابو مشعل

اخبر المثل يقول (اللي هذا اوله ينعاف تاليه)...

الله يسلمك .

يالله ابدأ الجزء الثاني :

قبل السفر كنت على اتصال مع رفيق لي يدرس بكولشستر (ساعة شمال شرق لندن وجامعتي جنوب غرب لندن) واخذت منه بعض التوصيات... جاء موعد السفر ويوم جيت اقص البوردنق قال الموظف لي العفش زايد ولازم ادفع 2100 ريال واخر شيء صار المبلغ 700 ريال ... قلت له ما معي قال لي انتظر اذا مافيه عفش كثير اشحن لك عفشك الزايد ببلاش ... وما قصر اخر شيء شحن العفش بدون فلوس ووادعت اخوي ...

وصلنا مطار هيثرو بلندن يوم الثلاثاء حوالي 10 الصبح وكان الجو حلو ... بعد ما خلصت من الجوازات والعفش وصلت الجمارك وسالني عن كراتين قلت كمبيوتر قلت هنا فيه كمبيوترات قلت عندنا ارخص وبعدين ليش اشتري واترك جهازي بالسعودية ... بعدها مشيت ولقيت رفيقي ينتظرني ... ورحنا على كولشستر.كانت المناظر على الطريق حلوة وتفتح النفس ... اشجار وانهار والهواء اللي يرد الروح ...

وصلنا كولشستر ورحنا على سكن الطلاب (رفيقي عزوبي) صلينا الظهر وتغدينا وبعده نمنا ... يوم جاء وقت المغرب رحنا لواحد من خويانا بالعمل (معه اهله) ومسوي لنا عشاء وانبسطنا هاك الليلة ويوم جيت انام جلست افكر واحس كاني بحلم وماني مصدق اني ببريطانيا ...

سالني خويي : كم معك فلوس ؟!
قلت : 400 باوند (وقتها تساوي حوالي 2200 ريال)
قال : بس ؟!!
قلت : ايه بس .
قال: وش تسوي لك ؟!!
قلت:تمشيني كم يوم واذا احتجت اسحب من حسابي بالسعودية .
قال: عسى حجزوا لك بالسكن ؟!
قلت: لا.
قال: اهم شي هنا السكن .
قلت: عشان كذا جيت عندك دبرني.

طلب مني اكلم الجامعة قلت لو كلمتهم ما افهم عليهم ويمكن هم ما يفهمون علي كلمهم انت ...
قالت المسؤولة عن معهد اللغة مافيه سكن
قال: اذا ما عندكم سكن ادرسه عندنا بالمعهد وندبر له سكن.(كان يعرف انهم يكذبون)
قالت:ابي احاول اساعدكم واكلم الاسكان ... اتصل علي بعد الظهر .
اتصل عليها وقالت حصلنا سكن وطلبت نعبي نموذج ونرسله له وفعلا لقوا لي سكن .

قام خويي يلومن على اني جايب مبلغ بسيط وماحجزت لي سكن قبل ما اجي ... قلت (بعين قوية): هذا من رداكم والا المفروض اجي من المطار والقى كل شيء جاهز ...

قضيت اربع ايام عنده قابلت شباب سعوديين بالمصلى بالجامعة وتمشينا بالجامعة وداخل كولشستر واول مرة اشوف سوق (tesco) وهو محل يشابه بندة ...

انتظروا الجزء الثالث اذا بتريدوا ...[/align]

**King Of Boston** · 06 Apr 2005, 12:27 PM

أخوي / رفحاوي
ما عليش أنا ودي أخش عرض قبل ما تخلص الموضوع لأن الشباب تحمسوا معك وشكل الاخوان الزعيم , الليث , الثقافي و أبو مشعل ناوين يروحون هناك لاكن علشان ما يتوهقون زيك وتجيب العيد فيهم وإلا معقوله واحد يروح يكمل دارسته هناك ولا يعرف وين يسكن لاكن حظك طيب لقيت واحد تعرفه هناك وإلا كان إلى الان وحنا نسمع إعلانات هذا الشاب خرج ولم يعد حتى تاريخه ............ ...............!!!!!!!!!!!!!

لاكن شباب اللي ناوي يروح يدرس هناك لغة أو يكمل دراسة هاكم هالرابط ورايح تحصلون شباب طيبين جداً وخدومين في بريطانيا ونصيحه اللي ناوي لازم يجمع معلومات عن كل شي المعهد , الجامعة , أسعار السكن والمدن الرخيصه وبذات أبحثوا عن المدن اللي ما فيها عرب كثير واللي ما عنده عضوية وما وده يشترك يكلمني .

http://www.saudistudents.org

مشكور أخوي رفحاوي

Your Brother King Of Boston

From U.S.A , Boston City

**رفحاوي** · 06 Apr 2005, 03:37 PM

هههههههههههههههههههه

اخوي / فتى بوسطن ...

مهو كانك تشرشحن والا اتوهم ؟!

اموري جت ملخبطة لان قرار الابتعاث صدر قبل الدراسة باسبوعين ... وتعرف صعب الواحد يدفع للسكن وهو ما يدري يروح والا لا ... خلال الاسبوعين امور كثيرة يبي للواحد يسويها من نقل العيال والسكن والسيارة والملابس ... الخ . ببريطانيا ما كان عندي مشكلة كبيرة خاصة المادية .

كان العيب ان قرار الابتعاث متاخر ...

اتمنى اتضحت الرؤية وبنفس الوقت اتفق معك بضرورة الاتصال بالمعارف بالخارج.

اهدافي من سرد هالقصة :

1. التحديث بنعمة الله سبحانه وتعالى علي وتسهيله لامور ومصاعب كثيرة جدا واجهتها قبل واثناء الدراسة.

2. اعطاء اخواني الكرام بارقة امل لامورهم ومشاكلهم ... فالله سبحانه وتعالى قادر على مساعدتهم كما ساعدني كثيرا ...

مشكور يا فتى بوسطن (ماكو عندنا كنوق الا واحد)

**ثقافي** · 06 Apr 2005, 08:06 PM

[align=center]أشوف ما جبت طاري لزواجك المبكر

وإلا إن كنت تشوف ما لذكره داعي

فلا تذكره

تقبل تحياتي

وننتظر الجزء الثالث

وهيك سؤال بدوه هيك جواب[/align]

**رفحاوي** · 07 Apr 2005, 03:26 AM

هلا اخوي / ثقافي ...

اشكرك على التواصل والدعم المعنوي المنقطع النظير ...

الموضوع عن الدراسة وشلون تبينن اتكلم عن زواجي البكر ؟!!

بعدين زواجي البكر احلى شيء وهذا بدون تخطيط ولا تفكير من محاكيك ... كان قسمة وكرم من ربك

نعم الله سبحانه وتعالى كثيرة منه وجود الوالدين والاخوان والمعزبة والعيال والصحة ....الخ

حتى دراستي انعم الله علي نعم كثيرة ...

الجزء الثالث

كان ضروري ناصل جامعتنا قبل السعة 5 عصر الجمعة عشان استلم الغرفة والا اضطر ادور لي اسكن بفندق (واسعاره غالية) ...
ركبنا القطار بعد صلاة الجمعة وبعد ساعة وصلنا محطة (ليفربول) ... جلس يشرح لي خويي وشلون استخدم قطار الانفاق
(UNDERGROUND) ... طلعنا من قطار الانفاق بمحطة(ووترلو) وتوجهنا للمدينة اللي به جامعتي ...

وصلنا الجامعة ورحنا للاسكان واستلمت الغرفة وكان كل شيء كئيب بالجامعة ...كانت الغرفة صغيرة وازعاج بالجامعة (مهيصين الناس اخر الاسبوع) ... وادعت خويي واصريت على ان اصحبه الى موقف الباص وكنت البس ثوب النوم (لزمت البسه من دبلة الكبد) ... وحنا رايحين للباص ما كنت اهتم بنظرات الناس للبسي الغريب ... لكن يوم رجعت انحرجت وتمنيت اصل الغرفة بسرعة وزادت دبلة كبدي ...حاولت ان اجد عربي ولكني فشلت واخيرا رجعت لغرفتي اضرب اخماس باسداس ...

كنت اعرف احد الزملاء يدرس بالجامعة ولم يكن بالجامعة اثناء وصولي ... اتصلت بجواله فاخبرني بانه في (ويلز) وسيرجع بعد اسبوع (اللهم طولك يا روح اسبوووع!) واعطاني رقم طالب سعودي موجود بالسكن ... اتصلت عليه واتاني وذهبنا عند دكتور اردني كانوا اهله مسافرين وما قصر سوى لنا عشاء ... وبعده جلسنا نسولف وعلمتهم بوضعي واني متزوج وابي بيت ... قالوا صعب تلقى بيت لان عيالك اكثر من ثنين ولو لقيتك يكون غالي وباكثر من 1500 باوند بالشهر (كنت احسب ما يتجاوز الف باوند) ... ويقولون ان واحد استاجر بيت ب 2000 باوند !!.. زادت دبلة الكبد

ويوم رجعنا للجامعة قلت لخويي الجديد تر تخصصي هندسة كهربائية وجاي ادرس اتصالات اقمار صناعية وصراحة الاتصالات مهي تخصصي الفرعي بالجامعة ... قال اجل وش جابك ؟!! هذي جامعة صعبة وترتيبها الخامس بين جامعات بريطانيا ... قلت : فرصة جت وما لقيت الا هالتخصص وطلبته ... قال: نصيحتي تقدم اعتذار وترجع احسن من تستمر وما تمشي بدراستك ... طبعا الكبد مستمرة بالاندبال

وصلنا السكن ورحت لغرفتي ورميت نفسي على السرير (حلوة رميت نفسي) واجلس افكر قبل ما اضرب اخماس باسداس كالعادة ... قلت : السكن ان شاء الله اضبط اموري على 1500-1600 باوند بالشهر ( حلو انحلت مشكلة السكن بس باقي الدراسة المصيبة)... بعد تفكير مهو طويل قلت لنفسي:يوم وصلت هنا وبعد هالتعب ابي ارجع ؟!! معصي على الاقل لو اطلع انا وعيالي باللغة الانجليزية يكفي ... واذا ما مشيت محد يبي يقطع راسي ... اما يخصمون من الراتب او يقولون لا ترسلونه (هذا اذا ما لقيت واسطة) ... صراحة حسيت اني حليت مشاكل السكن والدراسة وانبسطت وانفرجت اساريري وحطيت راسي على سريري وما تسمع الا شخيري ... زالت دبلة الكبد ....

يوم قمت جلست الفلف بالسكن والجامعة لعل وعسى القى لي شبيه ... ويوم ايست رجعت لمبناي واشوف هاك الرجال اللي يشبه محمد صبحي جالس يدخن برى المبنى واول ما شافن من بعيد سلم ... ومن امس واغير اتجاهي يمه واروح اصافحه (محد يلومن تقل لاقي بشاير ... بشاير ما جت هاك الحين ...مثل نايف) ... عرفن على اسمه وعرفته على اسمي وطلع الاخ من ليبيا ... جلسنا نسولف وطوالي هذيت له مشاكلي ... وقال: لا يهمك الدراسة راح تمشي ان شاء الله واهم شي تحل الاختبارات القديمة ... تطمنت وتونست وبديت اشكي له مشكلة جديدة الا وهي الجوووووع ذبحن الجوع واكلي تونة (خايف من الخنزير وما ادل محلات halal meat اللحم الحلال)... شكيت له ابي يدلن على محل او مطعم عنده رز ... الاخ اصر على اني اتغدى معه وعزمن على شقته (كان معه اهله) ...
قلت ابي اتريح واجيك بعد ساعة قال : باهي (يعني زين) ...

جيته بعد ساعة ودخلت شقته وكنا بمكان منعزلين عن مرته وكانت عندهم بنت اسمه فاطمة ...وقلط لنا الغداء وابدأ اضرب باكل قدامي مدري وشو لا هو رز ولا هو جريش بس طعمه زين لكن المشكلة اليدام فلفل ... وانا جالس اضرب بالخمس قال لي تعرف الاكلة هذي قلت لا (ما يهمن المظهر المهم الجوهر) قال هذا الكسكس قلت وشو ؟!! قال الكسكس ... وتنسد نفسي واشيل يدي واقول لنفسي ما لقيتوا غير هالاسم ؟!!

زادت علاقتي بابو فاطمة وكنت اذهب واشتري لحم واغراض وكان لا يتقبلها الا بعد ان اخبرته بانني محتاج لطبخهم واذا لم اساهم معه فلن اكل عندهم ورضي بصعوبة ... بعد كم يوم صرت استحي وانا كل يوم اتبربك عندهم وصرت اجلس بغرفتي وما اروح له ... صار ينتظرن واذا ما جيت يجيب لي الغداء ...

زادت علاقتي مع ابو فاطمة واصبحنا مثل الاخوة وبدأ يشكي من وضع الليبيين بشكل عام ... ان القذافي له افكار غريبة ويخسر مليارات على هالافكار ودعم المتمردين بدول كثيرة وفساد وظلم عندهم ... يقول بترولهم افضل من بترولنا وعدد سكانهم حوالي 5 ملايين يعني المفروض انهم افضل من حالتنا او على الاقل زينا ...

الله يذكره بالخير هو وزوجته وجميع الليبين الطيبيين اللي اعتبرهم اطيب العرب بعد السعوديين وغيروا فكرتي عنهم وهي انهم همجيين وغدارين وما يصلون مع الناس ...

اخوي / ثقافي ..

الى اللقاء بالجزء الرابع ان شاء الله ...

**ابو شنب** · 08 Apr 2005, 12:45 AM

يا علك بخير؟

تونست على سوالفك

مار مادامه خضرا وربيع باكر نشحن البهم يمكم

خل خويك الليبي يبلش بنا مثل مابلش بك

اقوووووووول وش تبي بهالموضوع يارفحاوي لو شاورتن ماشرت به عليك

وانت تخبر هقوات ابو شنب

الا ان كانك تبي تضربه عماد تجي باللي تجي به

انا رايي تسحب الجلنط

وتقول قعدت من نومي واثاري كل هاللي قلته لكم حلم

انفهق ياملا الغنيمه

**ليث** · 08 Apr 2005, 01:16 AM

هههههههههههههه

رفحاوي المعذره انقطعت عن النت

عموما انا مادبل كبدي غير اللي قالك ارجع بالله

عطن انا وابو شنب جواله خل ندق عليه ونفشله

والا عطن ايميله .... مايستحي يسويبك كذااا؟؟

مواضيعك رائعه فاستمر..............

(فيه فقره طمرتها بس بنمشيها)

**الفيلسوف** · 08 Apr 2005, 02:10 AM

[align=center]موضوع شيق

ننتظرك اخينا رفحاوي[/align]

**رفحاوي** · 08 Apr 2005, 06:22 AM

هلا وغلا بابو شنب وليث والفيلسوف ...

ابو شنب ...

كنت داخل الليلة عشان اكمل لكن شفت ردك وفرملت ...

يا ليت توضح لي ليه تبينن اقفل السيرة الذهبية ؟!!

**ليث** · 08 Apr 2005, 06:39 AM

على فكره رفحاوي

شلون تروح لبريطانيا مامعك الا كم دولار

انت تحسبنك رايح لدويد والا زهوه

او تبي اذا رحت لبريطانيا تمر معرض

ابن احمد وتاخذ ددسن.... قضيت على قولتك

آخر المشاركات

الموضوع: رحلة الثلاث الاف ميل تبدأ بواسطة (ابتعاثي لبريطانيا)

أدوات الموضوع

تقييم هذا الموضوع

عرض

رحلة الثلاث الاف ميل تبدأ بواسطة (ابتعاثي لبريطانيا)

مواقع النشر (المفضلة)

مواقع النشر (المفضلة)

ضوابط المشاركة